Foto nu gruom „Latgales kultūras darbinieki”, 2. grām., 2008

     Šūgod literaturzynuotnīkam, kritikam i pedagogam Vitoldam Valeiņam apritātu 90 godu. Nu 25. juļa leidz 8. augustam Rēzeknis Centraluos bibliotekys skaiteitovā var īsapazeit ar izstuodi, kurā apsaveramys gon V. Valeiņa saraksteituos i sastuodeituos gruomotys, gon bibliotekys apkūpuotī materiali par profesora dzeivi i dorbu.

 

Īskots Vitolda Valeiņa biografejā

 

     Dzims 1922. goda 27. julī Istrys (tagad Lauderu) pog. Rudovā. Vuicejīs Ludzys vydusškolā, piec tam studiejs Latvejis Vaļsts Universitatis Filologejis fakultatī, 1950. godā pabeidzs aspiranturu latvīšu literaturā.

 

     Nu 1951. leidz 1995. godam struoduojs LU Latvīšu literaturys katedrā. 1976. godā jam tyka pīškierts profesora grads, 1992. – habilitātuo filologejis doktora grads, a nu 1996. goda jis beja vaļsts emeritātais zynuotnīks.

 

     Latgalīšu kulturys dzeivis aktualitatēs V. Valeiņs īsasaisteja jau Atmūdys suokumā, pīsadaleja Reigys Latgalīšu kulturbīdreibys „Olūts” dybynuošonā, dorbuojuos apvīnuotajā Reigys Latgalīšu kulturbīdreibā „Trešuo zvaigzne”, sasadorbuoja ar Latgolys Kulturys centra izdevnīceibu, 1991. godā kliva par Latgolys Pietnīceibys instituta bīdru. Ari sovus studentus V. Valeiņs mudynuoja pīsavērst Latgolai i pieteit tuos autoru dorbus.

 

     Pyrmuo V. Valeiņa publikaceja pasaruodeja avīzī „Padomju Students” 1948. godā, tys beja roksts par studentu zynuotniskū dorbu, a 1950. godā īprīkš mynātajā avīzī tyka nūpublicāta juo pyrmuo recenzeja (par B. Sauleiša dzejis kruojumu „Gaismas gadi”). Tuoļuok presī publicāts cīš lels skaits rokstu.

 

     Sovā dorba myužā V. Valeiņs pieteja satirys, literaturys vierzīņu, seviški tālaineibys, poetikys i c. problemys dzejis teorejā, kai ari latvīšu lirikys atteisteibu, vierzīņus i stilus.

 

     Myužeibā V. Valeiņs aizguoja 2001. goda 20. decembrī, paglobuots Reigys Meža kopūs.

 

  

 

Vitolda Valeiņa gruomotys

„Poētika” (1961)

„Par dzeju” (1967)

„Latviešu lirika XX gadsimta sākumā (1900–1917)” (1973)

„Latviešu lirikas vēsture” (1976)

„Ievads literatūras zinātnē” (1978, puorstruoduota 1994)

„Dzīve – metafora – dzeja” (1982)

„Literatūras teorija” (1982)

„Latgaliešu lirikas vēsture” (1998)

„Daiļdarba analīze” (1999)

„Ievads latviešu literatūrteorijas vēsturē” (1999)

„Ievads literatūrzinātnē” (2007)

 

Leidzautors gruomotom „Rakstnieki un meistarība” (1975), „Daiļdarba analīze” (1981) i c.

 

Sastuodejs J. Poruka stuostu izlasi (1959), 2. i 3. siejumu latvīšu dzejis antologejai (1971–1973), dzejis antologejis „Mātei” (1971) i „Jūras dziesmas” (1973), Madsolys Juoņa dzejis izlasi „Lynu zīdi” (1999), „Latgalīšu dzejis antologeju” (2001) i c.

 

     --- Vitolda Valeiņa gruomotys Rēzeknis bibliotekuos

 

Izmontuotuo literatura
Latgales kultūras darbinieki. 2. grām. - Rīga, 2008. - 448 lpp.