Afiša “Latgalīšu grōmotys runoj”
Sagaidūt jau catūrtū oficiali svinamū Latgolys [kongresa] dīnu (27. aprelī) un popularizejūt latgalīšu rokstu volūdu, tymā izdūtōs grōmotys, aicynojam īsasaistēt rodūšajā aktivitatē “Latgalīšu grōmotys runoj”.
Cik saturiski bogōtu i skaistu grōmotu ir izdūts latgalīšu rokstu volūdā! Nu senejūs izdavumu viesturiskōs i poligrafiskūs īspieju īrūbežōteibys da myusu dīnu krōsainūs grōmotu plyudim – tys vyss ir myusu, latgalīšu, literaturys daļa. Nūslaucēsim putekļus i ceļsim tū gaismā i pi reizis – radēsim jaunus vōrdu salykumus i ryndys, kas ļaus sev i cytim gon pasmaidēt, gon aizadūmōt.
Pīsadalēt var kotrs interesents individuali, gon īsasaistūt kaidā nu grupom:
- školys (klašu grupys školōtōju vadeibā);
- bibliotekys un muzeji (individuali voi grupu dorbi);
- dzejnīki, rakstnīki (ar sovu voi kolegu izdūtūs grōmotu rodūšu apkūpōjumu).
Bibliotekā, sātā grōmotu plauktā voi internetā atrūnit grōmotys latgalīšu volūdā, salīcit tūs mugurenis vīnu iz ūtrys voi vōkus, taisūt vōrdu salykumus, teikumus voi pat dzejis ryndys i nalelus stōsteņus! Teksta lobskaņai var izmontōt saikļus i vōrdūs lūcēt. Vīnā biļdē sakombinejit i nūfotografejit izmontōtōs grōmotys, klōt pīrokstit sagōjušū interesantū salykumu i da 2022. goda 20. apreļam atsyutit iz e-posta adresi Šī e-pasta adrese ir aizsargāta no mēstuļu robotiem. Pārlūkprogrammai ir jābūt ieslēgtam JavaScript atbalstam, lai varētu to apskatīt., nūrōdit kontaktinformaceju (telefona numeri, e-posta adresi), vōrdu i uzvōrdu, pīsadolot individuali voi kaidā grupā; školu, klasi, školānus, kas īsasaistēja, i školōtōju; biblioteku i muzeju gadejumā – darbinīkus, kuri veidōja rodūšū dorbu, i personu, ar kuru organizatorim sasazynōt. Latgolys dzejnīki, rakstnīki aicynōti spēlētīs [popularizēt!] ar sovu voi kolegu grōmotu nūsaukumim.
Bibliotekys aicynojam mudynōt sovus laseitōjus pīsadalēt aktivitatē un aprelī izveidōt kaidu styureiti ar latgalīšu grōmotom, lai laseitōjs iz vītys, apmeklejūt biblioteku, var izveidōt sovu salykumu! Taipoš školōs itū aktivitati aicynojam izmontōt gon latvīšu volūdys stuņdēs, gon organizejūt nūvodvuiceibys stuņdis i rezultatu īsyutēt iz nūrōdeitū adresi.
Aktivitate tyka sōkta jau 2021. goda majā “Vietējās Latgales Avīzes” lopā “Byusim Vītejī” i paļdis tim atsauceigajim, kas sovus rodūšūs atrodumus jau atsyutiejuši (jiusu darbeni tik īkļauti kūpejā daleibnku sarokstā i vārtāti), bet nūteikti varit meklēt i radēt vēļ! Rodūšū aktivitati, Latgolys dīnai veļtejūt, organizej “Vietējā Latgales Avīze” un Rēzeknis Centralō biblioteka.
Saturiski interesantōkūs un originalōkūs dorbu autorim paradzātys bolvys. Piec konkursa salykumi tiks publicāti sātyslopā www.rezeknesbiblioteka.lv, lobōkī dorbi ari “Vietējā Latgales Avīzē”. Ļausim runōt latgalīšu grōmotom!
Itymā rodūšajā aktivitatē aicynojam grōmotu nūsaukumus izmontōt kai dorba materialu, navys meklēt volūdys skoborgys. Mierkis ir ceļt gaismā latgalīšu grōmotys tūs daudzveideibā! Skaidrs, ka latgaliski izdūtajōs grōmotōs sastapsit senejūs “streida ōbuļus” – gon ō (ar garumzeimi), gon divskani uo. Atgōdynojam, ka LR Tīslītu ministrejis Vaļsts volūdys centrā 2007. goda 28. septembrī pījimtajūs i apstyprynōtajūs «Latgalīšu pareizraksteibys nūsacejumūs» ir atļauts izmontōt obus pīroksta variantus, viņ īvārojūt konsekvenci. Runōsim, rakstēsim, dūmōsim latgaliski! Kas cyts tū darēs, jo na mes, latgalīši?!
Skaidrīte Svikša,
rodūšōs aktivitatis idejis autore
Aktivitatis daleibnīku izveidōti salykumi apsaverami afišā.
