Leidz 14. decembram Rēzeknis Centraluos bibliotekys skaiteitovā apsaverama Rēzeknis Suopu Dīvmuotis Ruomys katuoļu bazneicai veļteita izstuode, kurā izmontuoti bibliotekā apkūpuotī nūvodpietnīceibys materiali.

     Rēzeknis Suopu Dīvmuotis Ruomys katuoļu bazneicu 1935. godā suoka byuvēt mariaņu tāvi. Bazneicys projekta autors beja arhitekts Pavlovs, a dorbus vadeja tāvs Jurs Kārkle. Zemi i naudu bazneicys ceļšonai zīduoja Drycānu draudzis prāvesta Jezupa Voicehovska muosa Ludovika.

     Bazneicu izcēle divu godu laikā, i 1937. goda 6. decembrī tū īsvietieja Latvejis mariaņu priors tāvs Benedikts Skrinda, a piļneibā ceļtnīceiba tyka pabeigta 1939. godā.

     Kara laikā bazneica tyka sašauta, nu 1944. goda leidz laikam, kod Rēzeknis Suopu Dīvmuotis bazneicā suoka kolpuot prīsters Vladislavs Jankovskis (1956), dīvkolpuojumi ite nūtyka viņ reizi mienesī.

     Rēzeknis Suopu Dīvmuotis bazneica ir 14, 6 metrus gara i 12, 5 metrus plota āka ar flīžu greidu i skuorda jumtu. Bazneicā ir elektreiba i centralapkure. Laika gaitā dīvnoms ir pīdzeivuojs ari vairuokus remontdorbus i uzlobuojumus: izveiduotys vitražys, īguoduotys elektriskuos varganis, puorkuortuota elektriskuo instalaceja, izstuodeits ūtrs zvons i c.

     Bazneicys centralais oltors veļteits Suopu Dīvmuotis gūdam, lobajā pusī atsarūn Vyssvātuokuos Jezus sirds oltors, a kreisajā – svātuo Ontona oltors. Iz svātuo Ontona oltora atsarūn svātuo Jezupa oltorglezna (gleznā attāluota vysa Svātuo Saime), kas, īspiejams, ir L. Voicehovskys duovynuojums. Rēzeknis Suopu Dīvmuotis bazneicā atsarūn ari svātuo Jezupa skulptura i svātuos Terezis nu Bārna Jezus (Mozuos Terezeitis) skulptura.

     Nedeli pyrms svātuo apustuļa Andreja svātkim iz Jezus Sirds oltora bazneicā kotru godu teik nūvītuota svātuo Andreja oltorglezna. Nu 2001. goda Rēzeknis Suopu Dīvmuotis bazneicys lūgūs pi centraluo oltora ir svieteigūs mariaņu Stanislava Papčinska i Jura Matuleviča vitražys.

    Laika gaitā Rēzeknis Suopu Dīvmuotis bazneicā kolpuojuši prīsteri Jurs Kārkle, Jezups Grišāns, Aloizs Dunskis, Aloizs Vizulis, Bronislavs Kudiks, Vladislavs Jankovskis, Juoņs Sperga, Juoņs Buļs (tagadejais Rēzeknis-Aglyunys diacezis veiskups), Pāvels Zeiļa, Andrejs Trapučka i Ontons Škapars. Pošlaik bazneicā kolpoj Pāvels Zeiļa i Dainis Kašs.

     Bazneica atsarūn pošā Rēzeknis centrā natuoļ nu Latgolys Mārys pīminekļa, Rēzeknis pareizticeigūs bazneicys i ari Rēzeknis Centraluos bibliotekys.

• Cakuls J. Latvijas Romas Katoļu draudzes. - Rīga : Rīgas Metropolijas Kūrija, 1997. - 781 lpp.
• Rēzeknes Sāpju Dievmātes baznīcai - 75. - Rēzekne : Priesteru Mariāņu kongregācija, 2012. - 31 lpp. 

Nūdereigys saitis

• Īskots Rēzeknis Suopu Dīvmuotis draudzis viesturī